Ana səhifə Kult Sinema |
ABŞ-ın Los-Anceles şəhərinin Dolbi teatrında 2017-ci il Oskar mükafatının qalibləri açıqlanıb.
Kult.az xəbər verir ki, ən yaxşı film nominasiyası üzrə Oskarı “Ay işığı” filmi (Moonlight) qazanıb.
Ən yaxşı rejissor mükafatını isə “La La Lend” filmi ilə Demien Şazell alıb.
Gecədə ən yaxşı aktyor nominasiyası üzrə Oskara “Dəniz kənarında Mançester” filmindəki roluna görə Keysi Afflek, ən yaxşı aktrisa mükafatına isə Emma Stoun layiq görülüb.
Ən yaxşı xarici film nominasiyasında Oskar məşhur iranlı rejissor Əsgər Fərhadinin “Satıcı” filminə verilib. Əsgər Fərhadi Trampın 7 ölkənin vətəndaşının ABŞ-a girişinə qadağa qoyduğu üçün mərasimə qatılmayaraq, bu qərarı boykot edib.
Onun göndərdiyi çıxış mətni kürsüdə səsləndirilib. Fərhadi məktubunda “Bu gün orada olmamağımın səbəbi öz ölkəmin insanlarına olan hörmətimdən qaynaqlanır. Trampın viza qadağası insanlığa sığmayan bir addımdır”, - deyib.
Qeyd edək ki, bu, Əsgər Fərhadinin qazandığı ikinci Oskar mükafatıdır.
Tarix
2017.02.27 / 10:03
|
Müəllif
Aqşin Evrən
|