Rusiyanın xarici yardıma ehtiyacı yoxdur. Buna baxmayaraq, fövqəladə hallarda, o cümlədən də ölkəmizdə baş verən təbii fəlakətlər zamanı rus xalqı ilə xarici tərəfdaşların həmrəyliyinin təzahürünə dair çoxsaylı nümunələr mövcuddur.

Musavat.com xəbər verir ki, bu barədə ölkənin xarici siyasət idarəsinin rəhbəri Sergey Lavrov “Arqumenı i Faktı” nəşrinə verdiyi müsahibəsində digər ölkələrin Rusiyaya yardımına dair suala cavab verərkən bildirib.

Rusiya XİN rəhbəri bir sıra təbii fəlakətlərin nəticələrinin aradan qaldırılması zamanı göstərilən yardımlarda Azərbaycanın rolunu qeyd edib.

“2010-cu ildə yanğınlar zamanı Azərbaycan, Belarus, Ermənistan, İtaliya, Bolqarıstan, Qazaxıstan, Fransa, Polşa, Türkiyə və Latviya fövqəladə xidmətləri tərəfindən yardım göstərilib”, - Rusiya XİN rəhbəri bildirib.

“2012-ci ildə Azərbaycan və Belarus Rusiyaya Krasnodar vilayətində daşqından zərərçəkən əhaliyə humanitar yardım göndərib”, - deyə Sergey Lavrov vurğulayıb.