72 saat əvvəldən sel və daşqınların olacağı barədə məlumat verilmişdi. Bu, fəlakətin qarşısını almaq üçün kifayət qədər böyük müddətdir.

Axar.az xəbər verir ki, bu sözləri Təbrizin İran Parlamentindəki millət vəkili Əhməd Əlirza Beygi “Nümayəndə” həftəlik dərgisinə verdiyi müsahibəsində deyib. O bildirib ki, əgər vaxtında tədbirlər görülsəydi, hadisə zamanı insan təlafatı və dəymiş ziyan dəfələrlə az olardı.

“Təbrizdə fəhlə işləyən bir gənc xəbərlərdən sel və daşqının olacağını eşidəndən sonra kəndinə gedib və ailəsini təhlükədən qoruya bilib. Əgər bir adi fəhlə bunu bacarıb və təhlükəni hiss edibsə, səlahiyyətli şəxslər niyə bunu hiss edə bilməyib”, - deyə millət vəkili əlavə edib.

Qeyd edək ki, 14 apreldə Şərqi və Qərbi Azərbaycan vilayətlərində baş verən daşqınlarda 49 nəfər həlak olub, bölgəyə külli miqdarda ziyan dəyib, onlarla ev dağılıb.