Prezident son müraciəti ilə islam dünyasına ciddi mesajlar göndərdi və bütün islam dünyasını sülhə və birliyə səslədi.

Bu sözləri Axar.az-a Prezident İlham Əliyevin Bakı-2017 IV İslam Həmrəyliyi Oyunlarında qalib gəlmiş idmançılarımız, onların məşqçiləri və Azərbaycanın idman ictimaiyyətinin nümayəndələri ilə görüşündəki çıxışı ilə bağlı danışan millət vəkili Elman Məmmədov deyib. Millət vəkilinin sözlərinə görə, Bakı-2017 IV İslam Həmrəyliyi Oyunları da məhz bunun bir nümunəsi idi:

“Bu gün Azərbaycanda dinlər, millətlər və mədəniyyətlərarası münasibətlər bir nümunədir. İslam Həmrəyliyi Oyunları təkcə idman yarışları deyildi, eyni zamanda, siyasi, iqtisadi, mənəvi və mədəni xarakter daşıyırdı. Məqsəd birliyə, həmrəyliyə doğru irəliləyiş idi. Prezident hər zaman çıxışlarında bu amili xüsusilə vurğulayır. Hesab edirəm ki, islam dünyası cənab prezidentin verdiyi mesajlardan bir nəticə çıxarmalıdır. Çünki əgər birlik olmasa və sülh inkişaf etdirilməsə, əldə rəhbər tutulmasa, islam dünyasının bir hissəsində baş verən hadisələr bütün islam dünyasının axırına çıxacaq. Müharibə və vətəndaş qarşıdurmalarına son qoymaq üçün bütün islam dünyası vaxt itirmədən hərəkətə keçməli və həmrəy olmalıdır. Cənab prezidentin verdiyi bəyanatlarının mərkəzində dayanan ən əsas ideya da məhz budur”.