Ana səhifə Siyasət |
Ankarada EkoAvrasiya və Pursaklar bələdiyyəsinin təşkilatçılığı ilə “Türkiyə-Azərbaycan münasibətləri: Qardaşlıq və strateji ortaqlıq” mövzusunda beynəlxalq simpozium keçirilib.
Axar.az xəbər verir ki, tədbirin açılışında çıxış edən millət vəkili Qənirə Paşayeva türk dünyasına səslənərək çağırış edib.
Türk dünyasının müxtəlif bölgələrində türk kökənli insanların yaşadığı problemlərdən danışan millət vəkili bildirib ki, güc birlikdədir və ədalətsizliklərə qarşı daha güclü mübarizə aparılacaq.
Azərbaycan Prezidenti İlham Əliyevin “Türkiyənin gücü Azərbaycanın, Azərbaycanın gücü isə Türkiyənin gücüdür” fikirlərini vurğulayan millət vəkili çıxışında türk dünyasının ən böyük problemlərindən olan Qarabağ məsələsindən də danışıb.
Q.Paşayeva qeyd edib ki, bu məsələdə siyasətçilər, aydınlar, yazar, şair, araşdırmaçı, QHT və KİV-lərin üzərinə çox böyük missiya düşür:
“Son günlər bölgədə vəziyyət daha da gərginləşib. Türkiyə ilə birlikdə terror, cinayət və işğallar həyata keçirənlərə qarşı mübarizəmizi gücləndiririk. Düşmənin ədalət qarşısında cavab verməsinə nail olacağıq”.
Millət vəkili vurğulayıb ki, Azərbaycan prezidentinin yeritdiyi siyasət, görülən işlər, həyata keçirilən böyük layihələr, hər iki qardaş dövlətin beynəlxalq təşkilatlarda bir-birinə verdiyi dəstək indiki dönəmdə çox vacib addımlardandır.
Q.Paşayeva Ankarada Pursaklar bölgəsində də Qarabağ parkının salınmasından dolayı bələdiyyə başqanı Səlcuk Çətinə təşəkkür edib və bu cür addımların önəmini xüsusilə vurğulayıb.
Tarix
2017.05.25 / 15:37
|
Müəllif
Aygün Yusibova
|