Xarici siyasətdə varislik deyilən bir prinsip var. ABŞ Prezidenti Donald Tramp bu prinsipin üzərindən yekə bir xətt çəkir.

Axar.az xəbər verir ki, bu sözləri politoloq Elxan Şahinoğlu ABŞ Prezidenti Donald Trampın Mayamidəki bəyanatı və Kuba, o cümlədən İranla bağlı sazişlərdən imtinasını şərh edərkən qeyd edib. Politoloq bildirib ki, Barak Obamanın siyasətini tənqid etmək olar, ancaq onun imzaladığı sazişlərin əksəriyyətindən imtina etmək Amerikanın ciddiliyinə xələl gətirir:

“Tramp Obamanın Kuba ilə yumşalmaya yönəlik imzaladığı qətnaməsini də arxivə göndərdi. Belə çıxır ki, tutaq ki, gələn dəfə Hillari Klinton prezident seçilsə, o, Trampın Kuba ilə bağlı bəyənmədiyi sənədi yenidən qüvvəyə mindirəcək?”

Qeyd edək ki, Prezident Tramp Mayamidə çıxış edərkən Obamanın Kuba və İranla sazişlərindən imtina etdiyini açıqlayıb. Bu qərar dünyada sensasiya kimi qarşılanıb.