Erməni separatçıları və onlara havadarlıq edən Minsk Qrupu vasitəçiləri hər yerdə xəbər yayırlar ki, guya Azərbaycan və Ermənistan prezidentləri BMT-nin sentyabr sessiyası zamanı Nyu-Yorkda görüşəcəklər.

Axar.az xəbər verir ki, bu haqda politoloq Elxan Şahinoğlu yazıb.

Siyasi şərhçi bildirib ki, prezidentlərin Nyu-Yorkda görüşməsi üçün hər ikisi də BMT sessiyasına qatılmalıdır:

“Birincisi, prezidentlər heç də hər il BMT sessiyalarının açılış mərasimlərinə qatılmırlar.

İkincisi, Dağlıq Qarabağ danışıqlarında hansı irəriləyiş var ki, fikir mübadiləsi də aparsınlar.

Azərbaycana bu cür görüş imitasiyası heç lazım deyil, deyiləsi bütün sözlər deyilib. Danışıqlar 10 il də davam etsə, münaqişənin həllində heç nə dəyişməyəcək. Ona görə də işğalçıya təzyiqə etməyə davam etməliyik. Əslində, xarici işlər nazirlərinin görüşü də Azərbaycana lazım deyil. Rəsmi Bakı İrəvana ultimatum verməlidir ki, “mərhələli həll” planını qəbul etməyənə və Dağlıq Qarabağ ətrafındakı torpaqları boşaltmağa hazır olmayana qədər Ermənistanla bütün rəsmi danışıqlara moratorium qoyulacaq”.