Yeni Zellandiyada fəal siyasətlə məşğul olan Leyborist Partiyasının üzvü Tofiq Məmmədov bu ölkənin baş naziri, Leyboristlər Partiyasının sədri Caasinda Ardernlə görüşüb.

Axar.az xəbər verir ki, bu barədə diaspor üzrə araşdırmaçı-jurnalist Elnur Eltürk məlumat yayıb. O bildirib ki, bu il parlament seçkilərində Leyboristlər Partiyası T.Məmmədovun namizədliyini irəli sürüb:

“Siyasi dairələrlə əlaqələri güclü olan T.Məmmədov seçkilərdə məğlub olmasına baxmayaraq, partiyada kifayət qədər nüfuza malikdir. Bu əlaqələr iki ölkə arasında münasibətlərin inkişafına müsbət təsir göstərir. Çünki T.Məmmədov hər zaman Azərbaycanla fəxr edib.

T. Məmmədov seçki prosesində debatlar zamanı yerli əhaliyə özü, doğulub boya-başa çatdığı Azərbaycanın malik olduğu potensialdan danışıb və Dağlıq Qarabağ münaqişəsi haqqında ətraflı məlumat verib”.

Qeyd edək ki, 22 ildir Yeni Zellandiyada yaşayan T. Məmmədov 1978-ci ildə Bakıda doğulub, 18 saylı orta məktəbdə, daha sonra isə Yeni Zellandiyanın Okland şəhərində yerləşən Mount Roskill beynəlxalq məktəbində orta təhsil alıb. O, Açıq Politexnik İnstitutunun məzunudur.