Nikol Paşinyan özünü digər dünya liderlərinə tanıtmağa, yəni hakimiyyətini legitimləşdirməyə çalışır.

Bu sözləri Rusiya Siyasi Tədqiqatlar İnstitutunun direktoru, politoloq Sergey Markov Nikol Paşinyanın BMT Baş Assambleyasının 73-cü sessiyasında iştirakı ilə bağlı Axar.az-a danışarkən deyib.

Politoloqun sözlərinə görə, bununla da o, beynəlxalq təşkilatlar və müxtəlif ölkələrdən yardım almağı ümid edir:

“Seçki ərəfəsində Paşinyanın dəstəyə ehtiyacı var. O, erməni xalqının dəstəyini qazanmaq üçün əlindən gələni edir və bu işdə kənar qüvvələrin köməyinə ehtiyac duyur.

Buna görə də BMT Baş Assambleyası Paşinyanın hakimiyyətdə qalması üçün mühüm məqamlardan biri sayılmalıdır. Belə ki, burada Paşinyan dünyanın aparıcı liderləri ilə tanış olmaq fürsəti güdür. Üstəlik, Nikol Nyu York səfəri zamanı amerikalı siyasətçilərlə ünsiyyətini genişləndirməyə və bundan gələcəkdə yararlanmağa çalışacaq. Bütün bunlar Paşinyanın 4 ay ərzində itirdiyi etimadı geri qaytarmaq üçün etdiyi cəhdlərdir”.