Yanvarın 13-ü 10:20-də Qərb Universitetində Paris-Sorbon Əbu-Dabi Universitetinin (PSUAD) fransız dili təməl mərkəzinin açılış mərasimi keçiriləcək.

Axar.az xəbər verir ki, mərasimdə Paris-Sorbon Əbu-Dabi Universitetinin rektoru professor Erik Fuşe, Fransanın ölkəmizdəki fövqəladə və səlahiyyətli səfiri xanım Orelia Buşez, PSUAD biznes inkişafı üzrə məsləhətçisi cənab İmran Muxtarov və Qərb Universitetinin rəhbərliyi iştirak edəcək.

Paris Sorbon Əbu-Dabi Universiteti XII əsrdə əsası qoyulmuş Paris Sorbon Universitetinin təhsil sahəsindəki əlamətdar irsini davam etdirir. Bu əməkdaşlıq çərçivəsində Qərb Universitetində fəaliyyətə başlayacaq fransız dili təməl proqramını müvəffəqiyyətlə bitirən tələbələr Paris Sorbon Əbu-Dabi Universitetinin diplomunu əldə edəcək və birbaşa Fransanın istənilən universitetində təhsillərini davam etdirmək imkanı əldə edəcəklər.