Azərbaycanda müxtəlif müddətlərə azadlıqdan məhrum edilmiş 24 iranlı məhbus məhkumluq dövrünün qalan hissəsini çəkmək üçün martın 2-də İrana təhvil verilib.

Axar.az-ın məlumatına görə, bu barədə İranın Azərbaycandakı səfiri Cavad Cahangirzadə məlumat verib.

Səfir bildirib ki, İranın ədliyyə naziri Mustafa Purməhəmmədinin cari ilin fevralında Bakıya səfəri zamanı 24 iranlı məhbusun təhvil verilməsi ilə bağlı razılıq əldə olunub.

İranın ölkəmizdəki səfirliyinin konsulluq məsələləri üzrə məsul əməkdaşı Seyid Nasir Mircəmali bildirib ki, Azərbaycandakı iranlı məhbusların əksəriyyəti narkotik maddələrin qanunsuz dövriyyəsi ilə əlaqədar məhkum edilib. O, Azərbaycana səfər etmək istəyən iranlılara Azərbaycan Respublikasının narkotik maddələrin qanunsuz dövriyyəsinə görə cinayət məsuliyyəti nəzərdə tutan qanunları ilə tanış olmalarını, həmçinin özləri ilə psixotrop dərmanlar gətirməməyi tövsiyə edib.

Qeyd edək ki, son beş ildə Azərbaycandan İrana təhvil verilən məhbusların sayı 214-ə çatıb.