BDU-nun Jurnalistika fakültəsinin Televiziya və Radio Jurnalistikası kafedrasının müdiri Aynur Kərimovanın vəzifəsindən azad edilməsi tələbələrin etirazına səbəb olub.

Axar.az xəbər verir ki, fakültənin tələbələri Feysbuk sosial şəbəkəsində etiraz statusları yazaraq, Aynur Kərimovanın şəklini profil şəkli ediblər. Onlar kafedrada səsvermənin düzgün keçirilmədiyini və Aynur Kərimovanın fakültənin digər kafedraları ilə yaşadığı insident ucbatından vəzifəsindən çıxarıldığını bildiriblər. Fakültənin tələbələri məsələnin ictimailəşdirilərək, rektor akademik Abel Məhərrəmova çatdırılmasını istəyiblər.

Qeyd edək ki, dünən Televiziya və Radio Jurnalistikası kafedrasına müdir vəzifəsi üçün xüsusi komissiyada gizli səsvermə yolu ilə seçki keçirilib. Seçki nəticələrinə əsasən, Jurnalistikanin Nəzəriyyəsi və Təcrübəsi Kafedrasının müəllimi Allahverdi Məmmədli kafedra müdiri seçilib.