Bakının mərkəzində, Fəvvarələr Meydanında yerləşən "MakDonalds"​ restoranlar şəbəkəsinin nümayəndəliyi bağlanıb.

Bu gün səhər saatlarından restorana gələn müştərilər gözlənilmədən restoranın qapısının bağlı olduğunu görüblər. Restoranın qarşısında əyləşən işçilər gələn müştərilərə restoranın hansı səbəbdən bağlanıldığını izah edə bilməyiblər. Musavat.com-un əməkdaşına açıqlama verən işçilərdən birinin sözlərinə görə dünən axşam saatlarından məlum olmayan səbəbdən restoranın işıqları söndürülüb:

“Bununla bağlı rəhbərlik hələ ki, bizə izahat verməyib. Dünən gecə təxminən 4 saatlarında restoranın işıqları məlum olmayan səbəbdən söndürülüb. Lakin bizə bildirilib ki, bu gün axşam 10 radələrində restoran yenidən fəaliyyətə başlayacaq”.

Qeyd edək ki, Azərbaycanda ilk dəfə "MakDonalds" restoranı məhz Fəvvarələr Meydanında 1999-cu ilin noyabrın 6-da açılıb. Hazırda Azərbaycanda 10 "MakDonalds" restoranı fəaliyyət göstərir ki, bu restoranlarda da 850-dən çox əməkdaş çalışır.