Tiflisin keçmiş meri Vano Zodelava Gürcüstan paytaxtının kənarında baş verən avtomobil qəzasından sonra ağır vəziyyətdədir.

Virtualaz.org-un verdiyi məlumata görə, Vano Zodelava Azərbaycandan qayıdarkən qəzaya düşüb.

O, 22 iyul gecəsi Kvemo Poniçala ərazisində baş vermiş yol-nəqliyyat hadisəsinin iştirakçısı olub. Yolda "Mersedes", "Honda" və "Opel" markalı avtomobillər toqquşub. "Opel"in sürücüsü hadisə yerində ölüb.

Azərbaycandan Gürcüstana qayıdan 60 yaşlı sabiq mer qəza zamanı ciddi xəsarətlər alıb. O, Tiflisdə “Nyu Hospitals” klinikasına çatdırılıb və orada onun üzərində kəllə trepanasiyası əməliyyatı aparılıb. Hazırda Zodelava xəstəxananın reanimasiya şöbəsindədir.

Qeyd edək ki, Vano Zodelava 1998-dən 2004-cü ilə qədər Tiflisin meri vəzifəsində işləyib.