Lənkəran şəhərinin “Ləvəngi” dairəsində dünən gecə saatlarında baş verən kütləvi dava ilə bağlı araşdırma başladılıb.

Bu barədə Axar.az-a Lənkəran Rayon Polis Şöbəsindən dünən gecə saatlarında iki nəfərin bıçaqlanması ilə nəticələnən kütləvi dava barədə danışarkən bildiriblər:

“Hazırda araşdırma aparıldığı üçün əlavə məlumat verə bilmərik”, - polisdən bildirilib.

Lənkəran Mərkəzi Rayon Xəstəxanasından verilən məlumatda bildirilib ki, hadisə zamanı iki nəfər yaralanıb və gecə saatlarında xəstəxanaya yerləşdiriliblər. Yaralılardan birinin vəziyyəti ağırdır:

“Kütləvi davada ağır yaralanan 1977-ci il təvəllüdlü Paşayev Emin Qurban oğlu hazırda reanimasiya şöbəsindədir. O, bud nahiyyəsinin kəsilmiş-deşilmiş yarası ilə xəstəxanaya yerləşdirilib. Vəziyyəti ağırlığını qoruyur. Digər yaralı isə Travmatologiya şöbəsindədir. Vəziyyəti normaldır”.

Qeyd edək ki, Lənkəranın “Ləvəngi” dairəsi adlanan ərazisində kütləvi dava baş verib. Əraziyə iki avtomobillə gələn Liman şəhərinin 8 sakini burada avtoxuliqanlıq edib. Bu zaman taksi sürücüləri onlara irad tutub. Nəticədə, tərəflər arasında 10 nəfərin iştirak etdiyi kütləvi dava baş verib. Dava zamanı taksi sürücülərindən ikisi bıçaq xəsarətləri alıb.

Hadisəni törətmiş avtoxuliqanların sərxoş vəziyyətdə olduğu bildirilir.