Ana səhifə Toplum |
"Hadisə tərəfimizdən mütləq araşdırılacaq".
Bu sözləri Axar.az-a Nəqliyyat Nazirliyinin Mətbuat Xidmətinin rəhbəri Namiq Həsənov ötən gün əməkdaşımızın ağır bədən xəsarətləri alması ilə nəticələnən 176 nömrəli marşrutun sürət həddini keçməsinə münasibət bildirərkən dedi.
Onun sözlərinə görə, hadisə araşdırılacaq: "Əslində dünən bazar günü olduğundan bu hadisə ilə bağlı məlumatım yox idi. Amma bu gün hadisə barədə mənə bildirdilər. Mütləq araşdırma aparılacaq. "Bakısərnişinnəqliyyat" MMC-yə bu barədə rəsmi sorğu göndəriləcək və qanun çərçivəsində məsələ həll olunacaq".
Xatırladaq ki, dünən günorta saatlarında əməkdaşımız 176 nömrəli marşrut üzrə hərəkət edən "Toyota" markalı 10 TD 995 nömrəli avtobusla "Sədərək" Ticarət Mərkəzindən qayıdarkən, Xırdalan dairəsinə böyük sürətlə irəliləyən avtobusun qəfildən əyləci basması nəticəsində müvazinətini itirib və avtobusun döşəməsinə yıxılıb.
Özünü 1 saylı şəhər klinik xəstəxanasına çatdıran Gülnarə Kərimovanın müayinəsi zamanı bəlli olub ki, onun bədəninin sol nahiyəsində 4-cü qabırğa və sol qolu sınıb, sol ayağında isə topuğu çatlayıb. Gülnarə Kərimova gips salındıqdan sonra ambulator müalicəyə buraxılıb.
Tarix
2014.06.09 / 15:40
|
Müəllif
Şəmsəddin Ənsar
|