Ana səhifə Toplum |
Bakıda sərnişin avtobusu və daha 4 avtomobilin iştirakı ilə zəncirvari qəza baş verib.
Böyükşor şosesində qeydə alınan hadisə zamanı ilk öncə "Hyundai" və "Mercedes" markalı iki minik avtomobili toqquşub. Maşınların yolun hərəkət hissəsinin mərkəzində dayanması sonradan 5 maşının iştirakçısı olduğu digər qəzaya səbəb olub. Belə ki, 148 saylı xətt üzrə hərəkət edən "IVECO" markalı sərnişin avtobusu ilk öncə "Opel" markalı minik maşının vurub. "Opel" öz növbəsində "VAZ 2107"-yə və "Audi" markalı digər maşınlara çırpılıb.
Zəncirvari qəzanın iştirakçısı olan "Auidi" öz növbəsində qarşıda hərəkət edən "Hyundai" markalı başqa bir maşına dəyib. Avtobus isə "Mercedes" markalı digər nəqliyyat vasitəsi ilə toqquşandan sonra dayanıb.
Hadisə zamanı avtobus metronun "Koroğlu" stansiyasından üzü Zabrat qəsəbəsi istiqamətində hərəkətdə olub. Şahidlərin sözlərinə görə, avtobusda olan sərnişinlər arasında xəsarət alanlar da olub.
Hadisə vaxtı yaralanan sərnişinlər təcili tibbi yardımla 3 saylı şəhər xəstəxanasına aparılıb. Xəstəxanadan verilən məlumata görə, yol nəqliyyat hadisəsi ilə bağlı xəstəxanaya 6 nəfər gətirilib. Onlardan 4-nə ilkin tibbi yardım göstərilsə də, 2 nəfər travmatologiya şöbəsinə yerləşdirilib.
Qəza Sabunçu dairəsi istiqamətində avtomobillərin hərəkətində sıxlığın yaranmasına da səbəb olub. Hadisə iştirakçısi olan avtomaşınların ərazidən uzaqlaşdırılmasından sonra normal hərəkət bərpa olunub.
ANS
Tarix
2014.06.12 / 08:54
|
Müəllif
Axar.az
|