Avtomobilini harada saxladığını unudan sərxoş sürücü polislərə maşınının qaçırıldığını bildirib.

Daxili İşlər Nazirliyindən Axar.az-a verilən məlumata görə, avtomobilinin qaçırılması barədə polisə məlumat vermiş şəxs sərxoş olduğu üçün avtomobili saxladığı yeri unudub.

Sentyabrın 17-də Bakı şəhər sakini Asif Abdullayev DİN-in “102” Zəng Mərkəzinə Bakıxanov qəsəbəsi ərazisindən “Mersedes” markalı avtomobilinin qaçırılması barədə məlumat verib.

Sabunçu RPİ 13-cü PB əməkdaşları tərəfindən aparılan araşdırma nəticəsində məlumat təsdiqini tapmayıb. İzahatında A.Abdullayev sərxoş olduğu üçün avtomobili saxladığı yeri unutduğunu və buna görə qaçırıldığını düşündüyünü bildirib.