Azərbaycan Dillər Universitetinin rektoru Kamal Abdulla ötən gün tələbələrlə görüşüb. Mən də həmin görüşdə idim. Tələbələr onları narahat edən məsələlərdən danışdılar, Kamal müəllim də səbirlə tələbələri dinlədi, bəzi məsələləri yerindəcə həll elədi, bəzi məsələlərin də yaxın günlərdə həll olunacağını bildirdi.

Axar.az xəbər verir ki, bu sözləri Azərbaycan Dillər Universitetinin (ADU) İctimaiyyətlə əlaqələr şöbəsinin müdiri Ağa Cəfərli deyib. O, universitetlə bağlı yalan xəbərlər yayanları ittiham edib:

“Tələbələr akt zalını böyük ruh yüksəkliyi ilə tərk etdilər. İndi isə mətbuat dezinformasiya yayır ki, aksiya olub, kimlərəsə töhmət, şiddətli töhmət verilib, kimlərsə universitetdən qovulub. Belə ağ yalanı yazmağa vicdanınız necə yol verir, əliniz necə gəlir? Ayıbdır axı! Bir daha bəyan edirəm: heç bir aksiya olmayıb, heç kimə töhmət, şiddətli töhmət verilməyib, heç kim də universitetdən qovulmayıb. Yeri gəlmişkən, bilənlər bilir, bilməyənlər üçün xatırladım ki, universitetdən qovulma bir gün içində baş verəcək proses deyil. Araşdırma aparılmalı, təqdimat yazılmalı və rektorun əmri olmalıdır. Yaxşı, bilmirsinizsə, heç olmasa, bilənlərdən soruşun!”