Bakı şəhər Prokurorluğu Bakıda piyadanın ölümü ilə nəticələnən yol qəzası barədə məlumat yayıb.

Bakı şəhər Prokurorluğundan Axar.az-a verilən məlumata görə, məlum yol-nəqliyyat hadisəsinin “Mersedes Galendevagen” markalı avtomobillə törədilməsi barədə yayılan məlumatlar yalandır.

“Noyabrın 13-də Suraxanı rayonu, Bülbülə qəsəbəsi ərazisində, Aeroport yolunda Bakı şəhər sakini, 2-ci qrup əlil, 1959-cu il təvəllüdlü Vəliyev Abbas Əli oğlu idarə etdiyi “Toyoto Prado” markalı, 90 XX 747 dövlət nömrə nişanlı avtomobillə yolun hərəkət hissəsində piyada, 1971-ci il təvəllüdlü Quliyev Natiq Məmməd oğlunu vurub. Sonuncu aldığı xəsarətdən hadisə yerində ölüb

Faktla bağlı Suraxanı Rayon Polis İdarəsinin istintaq şöbəsində Cinayət Məcəlləsinin 263.2-ci (yol hərəkəti qaydalarını pozma – ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. İş üzrə müvafiq ekspertizalar təyin olunub, hazırda zəruri istintaq tədbirləri davam etdirilir” - deyə məlumatda qeyd olunurdu.

Xatırladaq ki, bəzi KİV-də məlum qəzanın məmur oğlu tərəfindən “Mersedes Gelandevagen” markalı avtomobillə törədilməsi barədə məlumat yayılmışdı.