Yollarımızda qırğınlar davam edir. Bir günə 10 ölüm. Bir hadisədə 5 nəfərin ölməsi isə dünyanın hər yerində medianın diqqətini çəkən faktdır. Dünənki hadisə üz-üzə toqquşmadır, deməli, onlardan biri əks istiqamətli zolağa keçibmiş.

Axar.az xəbər verir ki, bu sözləri hüquqşünas, yol-hərəkəti üzrə ekspert Ərşad Hüseynov dünən gecə saatlarında bir ailənin 5 üzvünün ölümü ilə nəticələnən yol qəzası ilə bağlı danışarkən deyib.

Onun sözlərinə görə, dünənki bu qırğın tipik bir şəraiti qabardıb. Həmin faciə qaranlıq vaxtı çiskinli havada avtomobillərin üz-üzə toqquşması ilə baş verib:

“Sürücülərimizin xeylisi bəsit bir faktı unudurlar. Gecə vaxtı görünmə onsuz da məhduddur. Qarşı-qarşıya hərəkət edən avtomobillərin işıqlarının yaratdığı fon isə görünməni 50%-ə qədər pisləşdirir. Gözlərin qamaşması olduqda isə görmə 0-a yaxınlaşır.

Bunun üzərinə islanmış şüşələri və güzgüləri də əlavə edəndə, az qala avtomobili gözübağlı sürmək kimi bir şey alınır. Ona görə də diqqətli olun, sürəti aşağı salın, sərt manevr etməyin, ötmədən və zolaq dəyişmədən çəkinin, əks istiqamətli zolaqlara keçməyi isə ağlınıza da gətirməyin. Belə şəraitdə hətta ayırıcı xətdən aralı, yolun ən sağı ilə sürün.

Dünənki hadisə üz-üzə toqquşmadır, deməli, onlardan biri əks istiqamətli zolağa keçibmiş. Nəticə göz önündədir: bir ailənin 5 üzvü artıq yoxdur”.

Qeyd edək ki, Lökbatan-Xocasən avtomobil yolunun Qaradağ rayonundan keçən hissəsində dəhşətli qəza qeydə alınıb. Qəza “Mersedes” markalı minik avtomobilinin idarəetməni itirərək “KamAZ” markalı yük maşınının arxa hissəsinə çırpılması nəticəsində baş verib.

Ölənlərin hamısı bir ailənin üzvləridir. Onların arasında 6 aylıq uşağın da olduğu bildirilir.