Binəqədi rayon Abay Kunanbayev küçəsində bir müddətdir təmir işləri aparılmasına baxmayaraq, yollar hələ də tam asfaltlanmayıb. Yollarda təmir işlərinin aparılmasına görə yağışlı havada həmin ərazidə hərəkət çətinləşir.

Məsələ ilə bağlı Axar.az-a açıqlama verən Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirib ki, həmin küçənin bir hissəsində təmir işləri artıq yekunlaşıb, digər hissənin təmiri isə təxminən 15 gün ərzində bitəcək:

“Keçmiş Azərbaycan Beynəlxalq Universitetinin qarşısından Axundov küçəsinin kəsişməsinə kimi olan yolun təmiri hazırda davam edir. Aidiyyəti qurumların yeraltı kommunikasiya xətlərini çəkməsi işi yenicə bitib, hazırda biz orada yolun genişlənmə işlərini görürük. Təxminən 15 gün sonra həmin yol asfaltlanaraq istifadəyə veriləcək”.