Ana səhifə Toplum |
Suraxanı rayonu, Qaraçuxur qəsəbəsindən Yeni Günəşliyə gedən yolda görülən işlər asfaltı dağıdıb.
Axar.az xəbər verir ki, uzun müddətdir sözügedən ərazidə aparılan işlər yekunlaşsa da, yolun dağılmış hissəsi bərpa edilməyib. Ərazidə avtobus və minik avtomobillərinin hərəkətində problem yaranıb.
Sakinlər bildiriblər ki, qazılan yer 141 saylı məktəbə gedən yolun üstü olduğuna görə uşaqlar dərsə gələn və dərsdən çıxan vaxt burada vəziyyət daha da acınacaqlı olur. Asfalt dağıdıldığına görə yağış yağan kimi yollar palçıq olur.
Məsələ ilə bağlı Axar.az-a açıqlama verən Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirib ki, qurum sözügedən ərazidə heç bir qazıntı işi aparmayıb:
“Yolu kim qazıbsa, onlar da bərpa etməli, problemi aradan qaldırmalıdır. Yolda qazıntı işlərini həyata keçirən quruma müraciət etmək lazımdır. Orada görülən işlərin bizimlə əlaqəsi yoxdur. Bərpa edə bilmirlərsə, bizimlə müqavilə bağlasınlar, yolu bərpa edək”.
Tarix
2018.02.26 / 16:57
|
Müəllif
Nigar İxtiyarqızı
|