Son 4 ildə əyalətdə məşğulluq səviyyəsi ilə bağlı açıqlanan rəqəmlər həqiqəti əks etdirmir.

Axar.az xəbər verir ki, bu sözləri Ərdəbilin millət vəkili Rza Kərimi işsizlik səviyyəsi və problemin aradan qaldırması üçün ayrılan vəsait haqda əsassız statistik məlumatların yayılmasına etiraz edərkən deyib. O, açıqlanan statistik məlumatların mənbəyinin dəqiq olmadığını qeyd edib:

“Kəndlərdə məşğulluq tədbirləri və bu işlər üçün verilən kreditlərlə bağlı yayılan statistik məlumatlar dəqiq deyil, ona görə də İctimai Rifah, Əmək və Kooperasiya İdarəsi bu məsələyə yenidən baxmalıdır. Ümumiyyətlə, son 4 ildə əyalətdə məşğulluq səviyyəsi ilə bağlı açıqlanan rəqəmlər həqiqəti əks etdirmir. Hesab edirəm ki, bu sahədə məlumatlar reallığa uyğun şəkildə hazırlanmalıdır”.

Ərdəbilin digər millət vəkili Südeyif Bədri də Ərdəbil əyalətinin məşğulluq üzrə işçi qrupunun İranın Əmək nazirinin iştirakı ilə keçirdiyi iclasda işsizlik probleminə diqqət çəkib və iqtisadi və ictimai vəziyyətin yaxşı olmadığını dəfələrlə dilə gətirib:

“Dövlət rəsmilərinin işsizlik səviyyəsinin aşağı düşməsi ilə bağlı rəsmi açıqlamaları yanlış məlumatdan başqa heç nə deyil və reallığı əks etdirmir. Bütün bunlar yanlış statistik məlumatlar quraşdırmağa bənzəyir. Əyalətdə məşğulluqla bağlı heç bir müsbət dəyişiklik hiss olunmur”.