Fransalı səyyahlar Jan Klod və Alen Vigi qardaşları səyahət üçün fərqli üsul seçiblər.

Onlar səyahətə çıxdıqları velosipedləri daha da təkmilləşdirərək əlavə panellər və qurğular quraşdırıblar. Nəticədə isə günəş panellərindən ötürülən enerji hesabına işə düşən mühərrik pedalları avtomatik hərəkət etdirir. Beləcə səyyahlar gün ərzində saatda 20-30 km sürətlə 200 km-dək məsafə qət edə bilirlər.

Uzanıqlı vəziyyətdə idarə edilən minik vasitələri ayaqlar yorulanda da hərəkətini davam etdirir. Gürcüstandan sonra səyahət üçün ölkəmizi seçən turistlər buradan Özbəkistana səfər etmək niyyətindədilər.

Hazırda Tovuzda olan qardaşlar daha 430 km məsafəni qət etmək üçün günəş panellərinin iki saat enerji yığmasını gözləyirlər. Onların hesabı ilə enerjiyə və istirahətə itirdikləri vaxtla birlikdə 96 saata Bakıya çatacaqlar.