Ana səhifə Toplum |
Yasamal rayonu Şərifzadə 168 A ünvandakı binanın həyətində yerləşən parkın ağaclarının “Qismət-M Construction” tikinti şirkəti tərəfindən kəsilməsilə bağlı məlumat getdikdən dərhal sonra nazirlik məsələyə müdaxilə edib.
Ekologiya və Təbii Sərvətlər Nazirliyindən Axar.az-a verilən məlumata görə, məlumat Bakı şəhər Ekologiya və Təbii Sərvətlər Departamentinin əməkdaşları tərəfindən yerində araşdırılıb. Sözügedən ünvana keçirilən baxış zamanı ağac kəsintisi faktı aşkar edilməyib.
Araşdırma zamanı ərazidə pilot layihə çərçivəsində “Qismət-M Construction” MMC tərəfindən köhnə beşmərtəbəli binanın sökülərək yerində çoxmərtəbəli yaşayış binasının və yeraltı avtomobil daynacağının tikildiyi müəyyən edilib. Dayanacağın girişindəki müxtəlif cinsli bioloji inkişafda olan 6 ədəd ağacın dayanacaq fəaliyyət göstərəcəyi təqdirdə kəsilmə təhlükəsi altında qalacağı qeydə alınıb.
Faktla bağlı akt tərtib olunub və ağacların qorunub mühafizə olunması, aqrotexniki qulluq göstərilməsi məqsədilə MMC-yə icrası məcburi olan “məcburi göstəriş” verilib.
Qeyd edək ki, sözügedən ərazidə tikinti işlərinin başlaması və ağacların kəsilmə təhlükəsi olduğu barədə Axar.az-a məhəllə sakinləri məlumat vermişdi.
Tarix
2018.07.23 / 16:00
|
Müəllif
Nigar İxtiyarqızı
|