Millət vəkili Qənirə Paşayeva Macarıstanda keçirilən Turan Qurultayının açılışı ilə bağlı rəsmi tanışlıq ziyafətində iştirak edib.

Axar.az xəbər verir ki, ziyafətdə çıxış edən millət vəkili macar xalqını, türk dövlətlərini və türk dünyasının müxtəlif bölgələrindən gəlmiş ictimai-siyasi xadimləri, alimləri, ziyalıları salamlayıb. Tədbirin önəmindən danışan millət vəkili Qarabağla bağlı çağırış edib:

“Bərabərliyimizi gücləndirsək, gücümüz artacaq və dalətsizliklərə qarşı da daha güclü mübarizə apara biləcəyik. Bu düşüncəyə və birliyə gəncliyimiz daha çox sahib olmalıdır. İnşallah, gələn Turan Qurultayını birlik və bərabərlik içində Ermənistanın işğalından azad edəcəyimiz Dağlıq Qarabağımızda və digər o gözəl bölgələrimizdə qeyd edək. İnanırıq ki, o gün uzaqda deyil”.

Millət vəkili Turan Qurultayının təşkilatçısı, Macar Turan Vəqfinin rəhbəri Andraş Biroya bu cür önəmli tədbiri təşkil etdiyi üçün təşəkkür edib:

“Var olsun bütün türk dövlətləri, xalqları və Turan! Allah birliyimizi, bərabərliyimizi daha da gücləndirsin. Dostlarımız sevinsin, düşmənlərimiz məhv olsun”.

Ziyafətdə bir sıra türk xalqlarının rəsmi şəxsləri, tanınmış aydınları və alimləri də çıxış ediblər.

Macar Turan Vəqfinin rəhbəri Andraş Biro çıxışında Dağlıq Qarabağdan danışıb, Azərbaycanın yanında olduqlarını vurğulayıb.

Macarıstan parlamentinin vitse-spikeri Şandor Lejak türk dünyasının müxtəlif yerlərindən gəlmiş aydınları salamlayaraq qurultayın önəmindən danışıb.