Millət vəkili Qənirə Paşayeva Macarıstanın Buğac meri Laszlo Szabo ilə görüşüb.

Axar.az xəbər verir ki, millət vəkili görüş zamanı Macarıstanla münasibətlərin inkişafına böyük önəm verdiyini bildirib və bu ölkədə keçirilən Turan Qurultayının vacibliyini qeyd edib.

Q.Paşayeva Turan Qurultayı ilə bağlı artıq bir neçə dəfə Buğacda olmaqdan böyük məmnuniyyət duyduğunu deyib.

Deputat Buğacın Azərbaycan bölgələrindən biri ilə qardaşlaşmasını təklif edib.

Buğac meri Laszlo Szabo Azərbaycanla əməkdaşlığı daha da genişləndirmək niyyətində olduğunu vurğulayıb.

Dağlıq Qarabağ münaqişəsi barədə danışan millət vəkili Azərbaycan həqiqətlərinin Macarıstan ictimaiyyətinin diqqətinə daha geniş şəkildə çatdırılması istiqamətində ortaq səylərin artırılmasının vacibliyini vurğulayıb.

Görüşdə qarşılıqlı əməkdaşlıq, ortaq tarix və mədəniyyətin öyrənilməsi, gənc nəsillərə çatdırılması, Macarıstan mədəniyyətinin Azərbaycanda daha geniş tanıdılması ilə bağlı da fikir mübadiləsi aparılıb.