İsveçdə yaşayan soydaşımız Turan Əliyev Mərkəz Partiyasından Partille bələdiyyəsinə üzv seçilib.

Bu barədə Axar.az-a diaspor üzrə araşdırmaçı-jurnalist Elnur Eltürk məlumat verib.

“Turan Əliyev bir ildir partiyada fəaliyyət göstərir. Hazırda bələdiyyədə partiyanın idarə heyətinin üzvüdür. Seçkilərdə yüksək səs çoxluğu ilə seçildiyi üçün bələdiyyədə və İsveçin ən böyük əyalətində komissiya və idarələrdə partiyanı təmsil edəcək. Qürurverici məqam odur ki, partiyanın 12 nəfərlik namizədindən yalnız Turan Əliyev bir əcnəbi kimi seçkilərə gedib”.

Hazırda İsveçdə 290 bələdiyyə, Partille bələdiyyəsində 51 üzv var. Onların hər biri səsvermə hüququna malikdir. Turan Əliyev də səsvermə hüququnu özündə daşıyacaq və qərarların qəbul olunmasında iştirak edəcək.

Qeyd edək ki, Turan Əliyev 1983-cü ildə Naxçıvanda anadan olub. 2004-cü ildə Naxçıvan Dövlət Universitetinin Yol hərəkətinin təşkili fakültəsini bitirib. Universiteti bitirəndən sonra İsveçə köçüb.