13:58

Kanalın efir mərkəzinin və yayımının paytaxt Bakıya köçürülməsi ilə əlaqədar olaraq, yayım avadanlıqları üzərində texniki işlər aparılması zərurəti yarandığından, ARB 24 telekanalının Tovuz şəhərindəki yayımı müvəqqəti olaraq dayandırılıb.

Kult.az xəbər verir ki, bu sözləri “ARB Media Qrup”un mətbuat xidmətinin rəhbəri Ozal İbrahimli Publika.az-a açıqlamasında bildirib. Onun sözlərinə görə, kanal yaxın günlərdə Bakı şəhərində qurulan yeni yayım mərkəzindən efirə çıxacaq:

“Bu texniki yenilənmələrdən başqa kanalın yayımı və fəaliyyəti ilə bağlı heç bir problem yoxdur. Biz yenə də böyük tamaşaçı auditoriyamıza ən yüksək səviyyədə informasiya buraxılışlarını təqdim etməyə davam edəcəyik. Kanalın icraçı direktoru Nadir Şəfiyev isə öz xahişi ilə işdən çıxıb. Onun vəzifəsinin icrası isə ARB 24 kanalının baş redaktoru Radik İsmayılova həvalə olunub”.

Qeyd edək ki, bu gün həmçinin N.Şəfiyevin oğlu, həmin televiziyada redaktor işləyən Allahverdi Şəfiyev də tutduğu vəzifədən azad edilib.