Səth sularının normal axıdılması üçün nəzərdə tutulan və yolun hərəkət hissəsinin kənarlarında yerləşən yağış-kanalizasiya sistemlərinə aid quyuların barmaqlıqları yoxa çıxıb.

Bakı Nəqliyyat Agentliyinin mətbuat katibi Mais Ağayev Axar.az-a bildirib ki, Hüseyn Cavid prospektində fiziki imkanları məhdud şəxslərin rahat hərəkəti üçün təşkil edilən pandusun qarşısındakı drenaj sisteminin dəmir barmaqlığı məlum olmayan səbəbdən çıxarılıb.

M.Ağayev qeyd edib ki, məsələ ilə bağlı artıq müvafiq qurumlara məlumat verilib.

Xatırladaq ki, bir neçə il öncə də Ziya Bünyadov prospektində 179 ədəd barmaqlıq yoxa çıxmışdı. Analoji faktlar Heydər Əliyev prospektinin “Böyük Şor yol qovşağı”ndan “Mərdəkan yol qovşağı”nadək olan hissəsində də qeydə alınmışdı. Orada da 69 ədəd yağış barmaqlığı oğurlanmışdı. Baş vermiş hadisə ilə bağlı yol təsərrüfatına külli miqdarda ziyan dəymişdi.

Dəmir barmaqlığın biri 30-35 manata başa gəlir.