Bu gün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan İmişli ASAN Xidmət mərkəzi fəaliyyətə başlayıb.

Bu barədə Axar.az-a açıqlamasında agentliyin mətbuat katibi Elnur Niftəliyev qeyd edib. O bildirib ki, mərkəzin bu gün açılmasına baxmayaraq, kifayət qədər vətəndaşa xidmət göstərilib:

“İmişli ASAN Xidmət mərkəzi İmişli, Saatlı, Biləsuvar, Beyləqan, Zərdab və Füzuli rayonlarında qeydiyyatda olan 624 mindən çox vətəndaşa xidmət göstərəcək. Hazırda ölkə ərazisində 15 ASAN Xidmət mərkəzi mövcuddur. Onlardan 5-i paytaxt Bakıda, 10-u isə regional mərkəzlər olmaqla Sumqayıt, Gəncə, Sabirabad, Bərdə, Qəbələ, Quba, Masallı, Mingəçevir, İmişli və Şəkidə yerləşir. 2019-cu ildə daha 5 ASAN Xidmət mərkəzi fəaliyyətə başlayacaq. Bununla da ASAN Xidmət mərkəzlərinin sayı 20-ə çatdırılacaq və respublikanı əhatə etmiş olacaq”.

E.Niftəliyev bildirib ki, artıq səyyar ASAN Xidmətlərə bu günədək 1 milyon 500 mindən artıq vətəndaş müraciət edib. Ümumilikdə isə ASAN Xidmətə müraciət edən vətəndaşların sayı 25 milyonu keçib.