Gürcüstanın Barışıq və Vətəndaş Bərabərliyi Məsələləri üzrə Dövlət naziri Ketevan Sixelaşvili noyabrın 17-də Marneuli şəhərində Marneuli, Bolnisi və Dmanisidə yaşayan, ölkənin ictimai-siyasi həyatında fəal iştirak edən azərbaycanlı qadınlarla görüşüb.

Axar.az xəbər verir ki, nazirliyin Kvemo Kartli bölgəsi üzrə müşaviri Ayaz Məmmədov Azərtac-a açıqlamasında görüşdə bələdiyyələrdə və ictimai həyatın müxtəlif sahələrində çalışan qadınların dövlət nazirinə və onun müavininə bölgələrdə mövcud problemlər barədə ətraflı məlumat verdiyini deyib.

Ketevan Sixelaşvili görüş iştirakçılarına vətəndaş cəmiyyətində fəal iştirak etdikləri üçün təşəkkür edib. Qaldırılan məsələlərin araşdırılacağını və onların həllinə çalışacaqlarını bildirib. Qeyd edib ki, azərbaycanlılar Gürcüstanın ictimai-siyasi həyatında fəal rol oynayırlar. Müxtəlif sahələrdə çalışan azərbaycanlı qadınlar da bölgənin inkişafına kömək edirlər. Onların bu fəallığı qürurvericidir.

“Bu, bir daha bizim tarixi Vətənimizin inkişafı naminə birliyimizi sübut edir”, - deyə K.Sixelaşvili vurğulayıb.