Ana səhifə Toplum |
DəmirBank plastik kartları ilə Hesab.az saytında kommunal ödənişlər etmək istəyən müştərilər xoşagəlməz hal ilə üzləşib.
Axar.az xəbər verir ki, müştərilər Hesab.az saytı vasitəsilə kommunal ödənişləri həyata keçirərkən ödədiyi məbləğin miqdarından asılı olmayaraq 1 AZN komissiya haqqı ödəməli olub.
Bu fakt Hesab.az saytının özündə də qeyd olaraq yerləşdirilib:
"Artıq DəmirBank müştəriləri öz kredit ödənişlərini Azərbaycanın ən böyük onlayn xidmətlər portalı olan www.hesab.az vasitəsilə vaxt itirmədən, istənilən vaxt, olduqları məkandan asılı olmayaraq daha rahat ödəyə və DəmirTaksit kartları, kredit kartları və nağd pul krediti üçün onlayn müraciət edə bilərlər. Həmçinin ödəniş zamanı bonuslar qazanıb dəyərli hədiyyələrə sahib ola bilərlər! Məbləğindən asılı olmayaraq ödənişlər zamanı 1 AZN komissiya tutulacaq".
Maraqlı məqam isə ondan ibarətdir ki, 0.50 AZN-lik ödəniş edən vətəndaşdan belə 1 AZN komissiya haqqı tutulur.
Məsələ ilə əlaqədar Dəmirbankdan Axar.az-a bildirdilər ki, hər ödənişə görə vətəndaşdan 1 AZN komissiya haqqının tutulması Hesab.az saytının tətbiq etdiyi tarifdir:
"DəmirBank müştəriləri bizim sayt və ya başqa vasitələrlə ödəniş etdiyi zaman heç bir əlavə komissiya tutulmur. Tutulan 1 manat komissiya ancaq Hesab.az saytı vasitəsilə edilən ödənişlərə aiddir. Bu Hesab.az saytının tətbiq etdiyi tarifdir. Tutulan komissiya haqqının miqdarının bu qədər olmasını da onlar özləri müəyyən ediblər. Bu qaydanı DəmirBank tətbiq etməyib və bunun bankla heç bir əlaqəsi yoxdur".
Tarix
2014.11.01 / 08:30
|
Müəllif
Natiq Azəri
|