"İlk yubiley yaşımızı fərqli tərzdə qeyd etmək hamımızın ürəyindən keçir. Təəssüf ki, hazırda maliyyə imkanımız arzuladığımızı reallaşdırmağa əsas vermir".

Bu sözləri Axar.az-a bu ay 10 illik yubileyini qeyd edəcək "Mediaforum.az" saytının baş redaktoru Azər Qaraçənli bildirib. Saytın ad gününün Yeni il ərəfəsinə təsadüf etdiyini deyən baş redaktor qeyd edib ki, 10 il öncə oxucularla ilk görüşə qışda, dekabrın 28-də çıxıblar:

"Saytımızın yaradılması – istər saytın texniki cəhətdən hazırlanması, istərsə də kollektivin formalaşdırılması, yaradıcı işlərin planlaşdırılması prosesinə 2004-cü ilin payızından başlansa da, "Mediaforum.az" oxucularla görüşə 28 dekabrda çıxıb. "Mediaforum.az" "İnternyus Azərbaycan" İctimai Birliyinin layihəsidir. Bütövlükdə "İnternyus Azərbaycan" təşkilatının kollektivi ilə birlikdə Yeni il bayramını keçirəndə "Mediaforum.az"ın ad gününü də qeyd edirik. Doğrudur, indi "Mediaforum.az"ın 10 yaşı tamam olur, bu isə yubiley yaşı deməkdir və sözsüz ki, onu fərqli bir tərzdə qeyd etmək hamımızın ürəyindən keçir. Təəssüf ki, hazırda maliyyə imkanımız arzuladığımızı reallaşdırmağa imkan vermir. Amma hər günün öz hökmü var. Sağlıq olsun, baxaq görək necə olacaq. "Mediaforum.az"ın 10 illiyini məxsusi qeyd etmək planımız olmasa da, qarşıdakı günlərdə belə bir planın ortaya çıxa biləcəyini, necə deyərlər, tam qırağa da qoymuram".

A.Qaraçənli əlavə edib ki, fəaliyyət göstərdikləri 10 ildə məqsədlərinə qismən çatıblar:

"Klassik təsnifata görə, jurnalistikanın üç missiyası var: məlumatlandırmaq, maarifləndirmək, əyləndirmək. Biz jurnalistikanın üç missiyasından ikisini seçmişik. Söhbət məlumatlandırmadan və maarifləndirmədən gedir. Həmişə ortaya yeni məlumatların çıxdığını və insanların daima maariflənməyə ehtiyac duyduğunu nəzərə alsaq, bəlli olur ki, biz məlumatlandırmanı və maarifləndirməni bir proses kimi tam tükədib başa vura bilmərik, biz onu yalnız yaşadığımız və işlədiyimiz dövrdə reallaşdıra bilərik. "Mediaforum.az" saytında da biz elə bununla məşğuluq. Fəaliyyət göstərdiyimiz 10 ildə məqsədimizə qismən çatmışıq. Eyni zamanda başa düşürük ki, bu, hətta tam çatılanda da tükənməyən bir məqsəddir".

Baş redaktor saytın gələcək planlarından da danışıb:

"Arzumuz çox, xəyalımız geniş olsa da, hətta bəzən xülyalara qapılsaq da, planımızı gerçəkliyə uyğunlaşdırmağa məcburuq. Hazırkı gerçəkliyə uyğun əsas planımız olanı qorumaqdır. "Mediaforum.az" ölkəmizdə Azərbaycan türkcəsində fəaliyyət göstərən bütün xəbər saytlarının böyük qardaşıdır. Şükür, hələ ki, özümüzü taleyin bu qismətinə uyğun apara bilirik. Allah bizi özümüzü başqa cür aparmaq biabırçılığından qorusun. Biz yalnız rəqabətdən danışa bilərik, rəqibdən danışmaq bizə yaraşmaz".