Bakıda satışda olan yolkaların qiyməti 5.49 AZN-dən başlayır.

Evlərdə Yeni il əhval-ruhiyyəsi yaradan bayram atributlarından ən önəmlisi yolkalar və onlara rəngarənglik verən bəzək əşyalarıdır. Yeni ilin rəmzi hesab olunan yolkaların və bəzək əşyalarının qiymətində isə hər il olduğu kimi, bayram ərəfəsində artım müşahidə olunur. Bununla yanaşı, yolkaların qiymətindəki fərq onların ölçüsü və keyfiyyətinə görə dəyişir.

Qiymətlərin hansı aralıqda dəyişdiyini müşahidə etmək üçün Axar.az olaraq paytaxtın böyük ticarət mərkəzlərindən biri olan "28 Mall" ticarət mərkəzinə yollandıq. Burada satışda olan ən kiçik yolkalar 5.49 AZN-ə, ən böyük olanları isə 107 AZN-ə satışa çıxarılıb. Orta qiymətlər isə 20-80 AZN aralığında dəyişir.

Şəhərin mərkəzi küçələrində satışda olan yolkaların isə müxtəlif qiymətlərlə əhatə olunduğun, bu qiymətlərin 6-200 AZN aralığında dəyişdiyinin şahidi olduq. Bəzək əşyaları isə 2 manatdan başlayan qiymətlərlə satışa çıxarılıb. Bu qiymətlər orta hesabla 20-30 manata qədər qalxır.

Bir sözlə, müşahidələrdən gəldiyimiz qənaətə görə, evində kiçik yolka qurmaq istəyənlər bəzək əşyaları ilə birgə təxminən 15-20 manat, orta ölçüdə (1.40 - 2 m) 70-100 AZN, daha böyük ölçüdə istəyənlər isə 200 manatdan çox pul xərcləməlidir.