"Bizim ailəyə məxsus pay torpaq sahəsi yeni çəkiləcək Cənub Qaz Dəhlizi ilə bağlı plana düşüb. Amma bizə nəzərdə tutulan kompensasiyanı düzgün şəkildə ödəmirlər".

Bu sözləri Ucarın Qaracallı kəndi sakini Gülayət Tağıyeva Axar.az-a müraciətində yazıb.

Onun sözlərinə görə, rayonun Aqrar İslahat Komissiyasının 28 dekabr, 1998-ci il tarixli qərarına əsasən 7 nəfərdən ibarət ailəyə 1,34 hektar pay torpaq sahəsi verilib: "Hazırda beynəlxalq qaz kəməri çəkilişinə başlanılıb. Bu işə təyin edilmiş məsul şəxslər savadsızlığımdan və həyat yoldaşımın vəfat etməsindən istifadə edərək, bizim ailəyə düşəcək kompensasiyanı mənimsəmək istəyirlər. Qonşumuzun 60 sot torpaq sahəsinə görə 19 min manat kompensasiya verildiyi halda, eyni istiqamətdə yerləşən 1,34 hektar torpaq sahəmizə cəmi 9.851 manat təklif edirlər".

G.Tağıyeva yazıb ki, Qaracallı kənd icra nümayəndəsi Musa Abdiyev və bu işə Bakıdan ezam edilmiş Faiq adlı məsul şəxs onu aldatmaq istəyib: "Biz bu pulu götürməkdən imtina etdik. Çörəyimizi əkin -biçinlə çıxardan zəhmətkeş kəndli ailəsiyik. Bizim tək qazanc yerimiz torpağımızdır. Bizim kompensasiya qanuni və ədalətli hesablanmalıdır. Rövnəq Abdullayevdən çox xahiş edirəm ki, bizə kömək etsin".