Ana səhifə Toplum |
"Azərbaycan dilinin orfoqrafiya lüğəti"nin 2013-cü ildə çıxan altıncı nəşri Azərbaycan Dil Qurumunun rəsmi saytına yerləşdirilib.
Azərbaycan Dil Qurumundan Axar.az-a verilən məlumata görə, nəşrdə müəyyən xətaların olmasına baxmayaraq, qurum öz saytında "Orfoqrafiya lüğəti"nin PDF formatında yerləşdirilməsinə qərar verib. Lakin dil xətalarına görə ADQ lüğətin onlayn axtarış sistemində proqramlaşdırılmasına ehtiyac görməyib. Hazırda adq.az saytında 2004-cü ilin nəşri (beşinci nəşri) onlayn axtarış sistemində fəaliyyətdədir.
"Azərbaycan dilinin orfoqrafiya lüğəti"nin altıncı nəşri (2013) cəmi min nüsxə buraxılıb və kitabın qiyməti 15 manatdır. Məhdud sayda buraxılmasına və internet istifadəçiləri üçün əlçatan olmamasına görə Azərbaycan Dil Qurumu kitabın PDF variantını oxuculara təqdim edib.
Lüğəti əldə etmək istəyənlər Azərbaycan Dil Qurumunun rəsmi saytına (adq.az) daxil olaraq kitabı PDF formatında yükləyə bilərlər.
Xatırladaq ki, hazırda ciddi tənqidlərə tuş gələn və qüsurlarına görə Nazirlər Kabineti yanında Tərcümə Mərkəzinin istifadəsindən imtina etdiyi "Orfoqrafiya lüğəti"nin yeni və təkmil variantının hazırlanması prosesi AMEA Dilçilik İnstitutunda davam edir.
Tarix
2015.11.06 / 13:15
|
Müəllif
Aqşin Evrən
|