Əvvəl metropolitenin işçiləri ay ərzində maksimum 60-65 metr tunel qazırdı. Lakin yeni qazma qurğusu ilə biz ay ərzində 350-400 metr tuneli hazır vəziyyətə gətirə bilirik.

Bu sözləri Axar.az-a Bakı Metropoliteni QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayev bildirib.

Onun sözlərinə görə, 4630 metr yol qət edən "Herrenknecht" qazma kompleksi bu gün xəttin şərti olaraq B4 adlanan stansiyasına daxil olub:

"Qazıntı işləri yerin üzünə çıxmayıb, tam olaraq yer altında aparılır. Bu gün qurğu B4 stansiyasında öz işini başa vurdu".

"Herrenknecht" qazma qurğusunun özəllikləri

"Müasir texnologiyadır, alman istehsalıdır. Bu qurğu təkcə qazma işlərini yerinə yetirmir. Eyni zamanda, torpağın təmizlənməsi, beton kubiklərin quraşdırılması və s. kimi tamamlama işlərini edə bilir", – Paşayev bildirib.

Onun sözlərinə görə, bu qurğunun Azərbaycanda tətbiqi ilə metro işçilərinin ixtisarı gözlənilmir: "2011-ci ildən bu mexanizm işləyir, amma bu vaxta qədər heç bir əməkdaşımız ixtisar edilməyib".

N.Paşayev şərti olaraq nömrələnən əraziləri də açıqlayıb:

"B1 (Avtovağzal), B2 (Memar Əcəmi), B3 (C.Məmmədquluzadə küçəsi (Papanin) stansiyalarımızda hazırda tikinti gedir. Şərti olaraq B4 adlandırdığımız stansiya 1 saylı Şəhər Kliniki Xəstəxanası ilə Tiflis prospektinin kəsişməsinə, B5 stansiyamız isə təqribən Qış parkı deyilən əraziyə təsadüf edir".

Qeyd edək ki, B5 istiqamətindəki sahənin hidrogeoloji şəraitinə uyğun qazma maşını üçün artıq montaj kamerası hazırlanıb. Bu gün işini başa vurmuş sipər isə gələcəkdə başqa sahələrdə istifadə ediləcək.