Avtomobil sənayesi getdikcə daha da təkmilləşir. Əgər əvvəllər avtomobillər əsasən benzin və dizel yanacağı ilə işləyirdisə, indi elektrik mühərrikli və hibrid avtomobillər də istehsal olunur. Gələcəkdə isə daha fərqli modifikasiyalara malik nəqliyyat vasitələrini görəcəyik.

Bu sözləri Axar.az-a açıqlamasında nəqliyyat eksperti Eldəniz Cəfərov Çin avtomobillərinin keyfiyyəti və onların Avropa istehsalı modellərlə müqayisəsi barədə danışarkən deyib.

Ekspertin sözlərinə görə, Çin avtomobillərinin postsovet ölkələrinin bazarına çıxması gözlənilən idi:

“Həmin ölkələrdə uzun müddət sovet və Rusiya istehsalı avtomobillər populyar idi. Sanksiyalar və Rusiya avtomobil sənayesindəki problemlərdən sonra həmin boşluğu Çin markaları doldurdu. İndi isə Çin maşınları təkcə postsovet məkanında deyil, bütün dünyada satılır”.

Cəfərov bildirib ki, son illərdə Çin istehsalçıları təhlükəsizlik və texnologiya sahəsində böyük irəliləyiş əldə ediblər:

“Artıq bir çox Çin avtomobilləri beynəlxalq qəza testlərindən yüksək bal toplayır və Avropa təhlükəsizlik standartlarına cavab verir. Alman avtomobilləri hələ də keyfiyyət və etibarlılıq baxımından liderdir, amma Çin markaları sürətlə bu səviyyəyə yaxınlaşır”.

Onun sözlərinə görə, bu proses sürücülərin seçimlərinə də təsir göstərir:

“Bəziləri Çin maşınlarına etibar edir, bəziləri isə ehtiyatla yanaşır. Lakin bazarın inkişafı göstərir ki, yaxın illərdə bu markalara olan inam daha da artacaq”.