Sosial şəbəkələrdə vətəndaşın KASKO sığortası ola-ola avtomobilini təmir etdirə bilməməsi ilə bağlı iddialar yayılıb. Bildirilir ki, avtomobil rəsmi servisdə olsa da, sığorta şirkəti ödənişi həyata keçirmədiyi üçün maşın uzun müddətdir servisdə qalır.

İddiaçı avtomobilinin yeni olduğu üçün bəzi zədələnmiş detalların təmir edilməsini deyil, yenisi ilə əvəz olunmasını tələb edib. Sığorta şirkəti isə açıqlamasında avtomobilin təmirə yararlı hissələrinin dəyişdirilməsinin nəzərdə tutulmadığını, yalnız təmir xərclərinin qarşılandığını bildirib.

Məsələ ilə bağlı sığorta eksperti Vüsal Bədəlov Axar.az-a açıqlamasında deyib ki, qanunvericiliyə əsasən sığorta hadisəsi baş verdikdən sonra (istər icbari, istərsə də KASKO üzrə) zərər hadisəsi maksimum yeddi iş günü ərzində qiymətləndirilməlidir:

“Qiymətləndirmə aparıldıqdan sonra vətəndaş tələb olunan sənədləri təqdim edir. Son sənəd təqdim edildikdən sonra isə sığorta şirkəti yeddi iş günü ərzində ödənişi həyata keçirməlidir. Əgər sənəd təqdim olunduqdan sonra ödəniş edilməzsə, gecikdirilən hər gün üçün ödənilməli məbləğin 0,1 faizi həcmində cərimə hesablanır. Vətəndaş həmin cəriməni sığorta şirkətindən tələb etmək hüququna malikdir.

Təmir prosesi isə ayrıca məsələdir və bu mərhələ servis ilə müştəri arasında bağlanmış akt əsasında tənzimlənir. Təmir servisi işin neçə günə və hansı formada icra olunacağını öz öhdəsinə götürür. Əgər təmir prosesi ilə bağlı problem yaranarsa, bu artıq vətəndaşla servis arasında hüquqi mübahisə predmeti ola bilər.

Qanunvericiliyə əsasən təmirə yararlı detallar dəyişdirilmir və rəsmi servis tərəfindən bərpa olunur. Bəzi hallarda, xüsusilə alüminium detallara malik avtomobillərdə (məsələn, “Mersedes” markalı nəqliyyat vasitələrində) servis detalları təmir etməyərək, dəyişdirilməsini tələb edə bilər. Bu halda sığorta şirkəti servisi detalı mütləq təmir etməyə məcbur edə bilməz”.

V.Bədəlov vətəndaşlara tövsiyə edib ki, qanun pozuntusu olduğunu düşündükləri halda sığorta şirkətlərinin fəaliyyətinə nəzarət edən qurum – Mərkəzi Banka müraciət etsinlər. Mərkəzi Bankın cavabına uyğun olaraq hüquqi addımlar atmaq mümkündür.