Yeni Ayfon-7 və Ayfon-7 Plus smartfonlarının sahibləri kütləvi olaraq eyni problemdən şikayət edirlər.

Lent.az-ın məlumatına görə, onların smartfonları cihazın oğurlanmasını mühafizə etmək üçün istifadə olunan "Activation Lock" mexanizminə görə bloka düşür.

Qarşılaşdıqları bu problemləri istifadəçilər sosial şəbəkədə də ictimailəşdirirlər. Onlar iddia edir ki, bu mexanizmdən istifadə etmək, sadəcə, mümkün deyil. Yeni cihazın sahiblərindən biri bildirib ki, onun "Ayfon"u alındıqdan dərhal sonra "icloud.com" saytından "Əpl ID" şifrəsini daxil etməyi tələb edib, sanki bu smartfondan kimsə istifadə edib. Şirkətin dəstək mərkəzindən bildiriblər ki, bu vəziyyətdə Ayfon-7 sahibinə ancaq telefonu dəyişmək qalır.

Cihazda artıq kimsə qeydiyyatdan keçdiyindən, istifadəçilər onu öz adına uyğunlaşdıra bilmirlər. Söz düşmüşkən, analoji problem "Ayfon" smartfonlarının daha əvvəlki 6S və 6S Plus modellərinə də aid olub. Bir il öncə aktivləşdirilən cihazların parametrləri sıfırlandıqda belə cihazlar işləmir.

Şirkət rəsmiləri bununla bağlı heç bir rəsmi şərh verməyiblər. Hələlik məlum olan odur ki, bütün zərərçəkənlər öz cihazlarını "Əpl"in xidmət mərkəzinə apara bilərlər. Orada şirkət əməkdaşları alınmış modelin çeki olduğu halda, onların telefonlarını blokdan çıxaracaqlar.

Çətinliklərlə üzləşən bəzi istifadəçilər bildiriblər ki, "Əpl" əməkdaşları yeni telefonları aktivləşdirməyə kömək ediblər. Digər alıcılar isə öz smartfonlarını yenisi ilə əvəz etməli olublar.