Gələn ildən Azərbaycanda "ikinci əl" avtomobillərin satışı üçün yeni prosedur müəyyən ediləcək. “Avtomobil satışı fəaliyyəti ilə məşğul olan rəsmi dilerlərdə istehsal tarixi 5 ildən artıq olmayan və yalnız nağdsız qaydada əldə olunan ikinci əl avtomobillərin satışı zamanı 3 il müddətinə ƏDV yalnız ticarət əlavəsindən hesablanacaq”, - yeni dəyişiklikdə bildirilir.

Axar.az xəbər verir ki, bu sözləri iqtisadçı ekspert Natiq Cəfərli Vergilər Məcəlləsinə “ikinci əl” avtomobillərlə bağlı təklif edilən dəyişikliyi şərh edərkən qeyd edib.

“Yəni hökumət təklif edir ki, dillerlər “ikinci əl” avtomobilləri nəğdsiz alıb-satanda, ƏDV-i əvvəlki kimi bütün məbləğdən deyil, ancaq marjadan, yəni alış-satış arasında olan fərqdən ödəyəcək.

Əla təklifdir, əvvəlki qayda tam məntiqsiz idi, indi isə siz avtomobili 20 minə alıb, 22 minə satsanız, yalnız o 2 minin 18%-ni ƏDV kimi ödəyəcəksiniz”, - ekspert vurğulayıb.

N.Cəfərli bu dəyişikliyin yalnız 5 ilə qədər olan avtomobillərə və nəğdsiz ödənişlərə deyil, bütün “ikinci əl” avtomobillərə tətbiq olunmasını məqsədəuyğun sayıb. Həmçinin dəyişikliyin “3 il müddətinə” deyil, daimi olmasını təklif edib.