İsti yay günlərində bəziləri avtomobilin kondisioneri işləsin deyə, mühərriki işlək vəziyyətdə qoyaraq, avtomobili park edir. Hətta bəziləri belə avtomobili uzun müddətə tərk edib gedir. Bu həm qanunsuzdur, həm də çox təhlükəli.

Axar.az xəbər verir ki, bu sözləri “Digesta” firmasının direktoru, hüquqşünas Ərşad Hüseynov yayda avtomobilin maşında kondisionerin açıq vəziyyətdə qoyulmasının fəsadları barədə danışarkən deyib. Ekspertin sözlərinə görə, qəbul edilmiş qaydalar sürücünün mühərriki işləyən avtomobili tərk etməsini qadağan edir:

“Bu, çox təhlükəlidir. Çünki hər şey ola bilər. Belə vəziyyətin təhlükəliliyi isə həm ekoloji ziyanla, həm də bədbəxt hallarla bağlıdır”.

Ə.Hüseynovun sözlərinə görə, hərəkətsiz halda mühərriki uzun müddət işləyən avtomobil asanlıqla alışa bilər:

“İstehsalçı zavodların əksər avtomobillərə mühərriki işlək avtomobilin qapılarını bayırdan kilidləmək funksiyasını qoymaması bundan irəli gəlir. Kimin avtomobilində belə funksiya varsa, deməli, elektrik sisteminə müdaxilə edilib. Elektrik sisteminə müdaxilə olan avtomobil isə çox asanlıqla yanmağa məhkumdur”.

Ekspert deyir ki, ekoloji ziyan da göz qabağındadır:

“Dayanan avtomobilin mühərrikində normal yanma getmir. Dəm qazı və digər zərərli maddələr artır. Nəticədə ətrafdakılar tədricən zəhərlənir, avtomobilin özündə olan adam isə çox asanlıqla dəm qazından ölə bilər. Ölkəmizdə tez-tez belə hallar baş verir. Belə hallarda avtomobilə texniki zərər də dəyir”.