Avropa, Asiya və ABŞ istehsalı olan avtomobillərin illik texniki baxış müddətinin bitməsinə 17 gün qalıb.

Axar.az xəbər verir ki, bu barədə xatırlatmanı “Digesta” hüquq firmasının direktoru, nəqliyyat eksperti Ərşad Hüseynov şəxsi Feysbuk hesabında paylaşıb.

Ekspert qeyd edib ki, ayın son günlərində növbələrə durmamaq üçün tələsmək lazımdır:

“Sürücü dostlar, Rusiya və başqa MDB dövlətləri istisna olmaqla, xarici ölkələrdə (Almaniya, Yaponiya, Koreya, ABİ, Fransa, İran, Çin və s) istehsal olunan minik avtomobillərinin, onların qoşqularının və motosikletlərin illik texniki baxış müddətinin bitməsinə cəmi 17 gün qalıb. İndidən avtomobilinizi baxışdan keçirin ki, ayın son günlərində növbədə qalmayasınız. Verilən məlumata əsasən, baxış məntəqələri hətta şənbə və bazar günləri də adi iş rejimi ilə işləyəcək”.

Qeyd edək ki, “Yol hərəkəti haqqında” Qanunun 30-cu maddəsinə əsasən, bu il texniki baxışdan 2012-ci, 2010-cu, 2008-ci, 2006-ci ildə və ondan əvvəlki bütün illərdə istehsal olunan minik avtomobilləri, onların qoşquları və motosikletlər keçirilməlidir.