"Samsunq Elektroniks" şirkəti sərmayədarlarla rüblük maliyyə nəticələrinə həsr edilən konfransda "Qalaksi Not-7" modelini əvəz edəcək smartfonun buraxılışı ilə bağlı fikirlərini bölüşüb.

Azərtac xəbər verir ki, Cənubi Koreya istehsalçısının marketinq direktorunun sözlərinə görə, "Samsunq Qalaksi Not-8" multimedia kontentindən istifadə üçün ən yaxşı mobil qurğu olacaq. O qeyd edib ki, "Samsunq Qalaksi Not-8" smartfonu əvvəlki modellərlə müqayisədə daha təkmil və zəngin multimedia imkanları ilə təchiz ediləcək.

Bildirilir ki, "Qalaksi Not-8" Cənubi Koreya istehsalçısının ilk qoşa kameralı smartfonu ola bilər. Qurğunun kamerası 12 meqapikselli enlibucaqlı modula və 13 meqapikselli telefoto moduluna malik olmaqla birlikdə üçqat optik zummeri təmin edəcək. Qeyd edək ki, "Ayfon-7 Plus" modeli də analoji konstruksiyaya malikdir. Bundan əlavə, akkumulyator tutumu 3300 milliamper/saata bərabər olacaq smartfon "Android 7.1.1 Nougat" əməliyyat sisteminin idarəetməsi ilə işləyəcək.

Şirkət rəsmən təsdiq edib ki, smartfon avqustun 23-də Nyu-Yorkda keçiriləcək tədbirdə təqdim ediləcək. Satışlara bir ay sonra başlamaq planlaşdırılır.

"Qalaksi Not-8" modeli "Samsunq" şirkətinin ən bahalı smartfonu olacaq. Belə ki, qurğunun qiyməti Cənubi Koreyada təxminən 1000 dollar, Avropa, Cənubi və Şimali Amerikada 1100 dollar təşkil edəcək.