Bu gün bütün dünyada Ümumdünya Avtomobilsiz Günü kimi qeyd edilir.

Axar.az xəbər verir ki, bu gündə avtomobil (eləcə də motosiklet) sahiblərinə, heç olmasa, bircə gün yanacaqsız nəqliyyat vasitələrindən istifadə etmək təklif olunur. Dünyanın əksər ölkələrində avtomobili olanlar bir günlük ondan imtina edir.

Bu günü qeyd etmə ənənəsi 1998-ci ildə Fransada yaranıb. O zaman bunu yalnız bir neçə şəhər qeyd edib. Lakin hazırda Avtomobilsiz Gün dünyanın 40-dan çox ölkəsində, 1500-dən artıq şəhərdə qeyd edilir.

Bu gün təkcə xüsusi təyinatlı avtomobillərə aid edilmir. Yanğınsöndürənlər, təcili tibbi yardım, polis və s. xüsusi təyinatlı avtomobillər bu gün öz işlərinə davam edir.

Ümumdünya Avtomobilsiz Günü ilə əlaqədar bir sıra ölkə və şəhərlərdə xüsusi tədbirlər təşkil olunur. Həmçinin əksər ölkə vətəndaşları da bu gün könüllü olaraq avtomobildən imtina edir. Lakin çox təəssüf ki, indiyə qədər Azərbaycanda bu gün hansısa formada qeyd edilməyib.

Bu günü ölkəmizdə yalnız “Yaşıl velosipedçilər klubu” qeyd edib. 2 il öncə onlar “Maşınsız bir gün” kampaniyası çərçivəsində Bakı şəhəri daxilində velotur təşkil etmişdilər.

Bu il isə "Həyat" Humanitar Dəstək İctimai Birliyi Ümumdünya Avtomobilsiz Gününə həsr olunmuş tədbir keçirəcək.