Radiodakı aktiv fəaliyyəti və avtomobil sürücülərinin maariflənməsi üçün hazırladığı layihələrlə tanıdığımız DJ Tural (Yusifov) yeni rubrikasını təqdim edib.

Kult.az xəbər verir ki, o, yeni mövsümdə rubrikasının Kasko sığortasına aid olacağını bildirib. Tural qeyd edib ki, bu mövzuda xeyli araşdırma aparıb və çoxlu sayda suallar, problemlərlə qarşılaşıb. O, sığorta sahəsində müştərilərə müxtəlif şərtli müqavilələrin təqdim olunmasının, müqavilənin şərtlərinin bir çox hallarda aydın olmamasının əsas problem olduğunu deyib:

“Azərbaycanda avtomobil sığortası mədəniyyəti digər ölkələrlə müqayisədə tam formalaşmayıb. Bu səbəbdən yeni rubrikanı həm də sosial maarifləndirmə layihəsi kimi görürəm. Rubrikada hər kəs avtomobil sığortası sahəsində qarşılaşdığı problemlərdən danışacaq, mən isə hər problemin həllinə və yaxud yaranma səbəbinə uyğun şərhlərimi bildirəcək, müzakirələr və araşdırmalar aparacağam”.

Qeyd edək ki, “Avto Kasko” rubrikası həftə içi hər gün 18:30-19:30 arasında 106.3 FM-də yayımlanacaq.