Britaniyanın “Park İndiqo” agentliyi dünya ölkələrində ən çox istifadə edilən avtomobillərin siyahısını hazırlayıb.

Axar.az xəbər verir ki, siyahıda ilk yeri “Toyota Hilux” pikapı tutub. Belə ki, bu avtomobil dünyanın 25 ölkəsində ən çox satılanlar arasında ilk yerdə qərarlaşıb. İkinci yerdə “Volksvagen Qolf” gəlir. O, daha çox Avropa ölkələrində liderlik edib.

Üçüncü yeri isə “Toyota Lənd Kruizer” tutub. Bu avtomobilə ən çox Afrika və Yaxın Şərq ölkələrində ehtiyac olub.

Agentliyin reytinqində Azərbaycan da yer alıb. Belə ki, 2017-ci ildə Azərbaycanda ən çox satılan avtomobil LADA 4x4 olub. Agentliyin siyahısına düşən qonşumuz Rusiyada ilk yerə “Hyundai Solaris”, Türkiyədə isə “Fiat Egea” layiq görülüb.

Postsovet məkanında yeganə olaraq Azərbaycanda Rusiya istehsalı olan avtomobil liderlik edib. Azərbaycandan fərqli olaraq, Qazaxıstan və Qırğızıstanda “Toyota Kəmri”yə, Türkmənistanda “Mersedes C Klas”a, Özbəkistanda “Daevo Neksia”, Ukraynada “Toyota RAV 4”, Moldovada “Dacia Logan”, Belarusda “Volksvagen Polo”, Estoniyada “Şkoda Oktavia”, Latviyada “KİA Sporteyc”, Litvada “FİAT 500”-ə üstünlük verilib.

Ermənistan, Gürcüstan və Tacikistan bu siyahıya düşməyiblər.