Bəzi alqı-satqı saytlarında avtomobilin dövlət nömrə nişanının fantastik qiymətə satışa qoyulması barədə elanların heç bir əsası yoxdur. Çünki nömrələr ancaq Dövlət Yol Polisi İdarəsinin Qeydiyyat-İmtahan idarəsi və şöbələrində satıla bilər.

Bu sözləri Axar.az-a Baş Dövlət Yol Polisi İdarəsinin şöbə rəisi Kamran Əliyev bir çox alqı-satqı saytlarında olduqca yüksək qiymətə satışa qoyulan avtomobil nömrələri ilə bağlı danışarkən deyib.

Şöbə rəisinin sözlərinə görə, bunun üçün dövlət rüsumu müəyyən edilib:

“Bəziləri saytlar elə qiymətə nömrə satışını elan verir ki, heç kim o qədər pulu aparıb bir nömrəyə verməz. Hər bir halda nömrələrin qeydiyyat prosesi DYP-də həyata keçirilir. Nömrə satmaq qanunla qadağandır və bildiririk ki, insanlar belə elanlara inanmasınlar. Orada əks olunan nömrələrin bəzisi mövcud deyil, bəzisi isə tamam başqa adamların avtomobilinin üzərinədir. Odur ki, bu cür cəfəng elanlara inanmayın. Bir daha qeyd edirəm ki, qanunvericiliklə nömrələrin satışı yalnız Dövlət Yol Polisi tərəfindən həyata keçirilir”.

Qeyd edək ki, bəzi alqı-satqı saytlarında hətta 150.000 manata avtomobil nömrəsi satışa çıxarılıb. 10 DD 888 nömrəsini satan sahibi ona bu qədər qiymət müəyyən edib.